Ezabaketa kalejirarekin herri osoan zehar hizkuntza eskubide urraketak gertatzen diren hainbat leku markatu zituzten: udaletxea, epaitegia, osasun etxea eta eskola. "Udaletxean ezinezkoa da tramite eta harreman guztiak euskaraz egitea, EHEko kideen aurkako epaiketak argi erakutsi du ezinezkoa dela gure hizkuntzan normaltasunez deklaratzea eta epaitegiko informazioa euskaraz jasotzea, osasun etxean medikuekin harremana espainolez izatera ohitu gara eta A eta B ereduek ez dute euskalduntzen", azaldu dute sakandarrek. Bukatzeko, euskaraz bizitzeko zailtasunak agerian uzten dituzten bideoak proiektatu zituzten eta euskararen ezagutzaren unibertsalizazioa eta hizkuntza politika burujabe baten beharra ere aldarrikatu zuten.

Horma-irudia Agoitzen

Bestalde, Agoitzen (Nafarroa) horma-irudia egin dute. Irudi ederra margotu dute karrikan, euskaraz bizitzeko hautua indartzeko asmoz. Euskaraz bizi! mezuarekin horma-irudi gehiago egin dira Euskal Herrian. Donibane Lohitzunen (Lapurdi), Atarrabian (Nafarroa), Iruñean eta Gasteizen kasu. Horma-irudiaren bideoa prestatu du Agoizko EHEk.