Euskal Herrian Euskaraz Albisteak Hedabideak

Hamaika TB, telebista euskaldun eta euskaltzaleak urrats handia egin du gaurkoan. Orain arte Araba, Bizkaia eta Gipuzkoan ikus zitekeen soilik Euskaltel edo LTD-aren bitartez, baina gaurtik aurrera internet bidez emititzen hasi eta mundu osotik ikusi ahal izango da euskarazko hedabidea. Etorkizun polita du aurretik egitasmoak, eta gisa honetako tresnekin, aipatu hiru herrialdeez kanpo dauden hango eta hemengo euskaldunei helarazi die eskaintza. Nestor Urrestarazu, Hamaikako informatikariak aditzera eman duenez, bere kabuz montatutako sistema bat baliatu behar izan dute internet bidezko emisioari ekiteko. Hamaika ikusteko jaioak gara!

Egunkaria auzia delakoaren baitan une garrantzitsua bizi izan da gaurkoan, Madrilgo (Espainia) Audientzia Nazionaleko Gomez Bermudez epaileak, absoluzioa jakinarazi baitie bost auzipetuei. Pozteko albistea etorri da oraingoan epaitegi berezitik, baina kaltea eginda dago; izan ere, 7 urte iragan dira Estatuak indarrez Egunkaria itxi eta herri euskaldunaren kontrako erasoa abiatu eta herri euskalduna bera, euskara, euskalgintza, herri mugimendua eta abar kriminalizatu zituenetik. Epaiak absoluzioa jasotzen du, baina Egunkariak itxita jarraitzen du

Euskal gehiengo sindikalak Egunkaria auziko auzipetuekin bat egin du gaur Bilbon, 'Egunkaria libre' lelopean burutu elkarretaratzean. Bertan hartu dute parte ELA, LAB, EHNE, Hiru, ESK eta EILAS sindikatuetako kideek. Sindikalgintzarekin batera elkarretaratu dira hainbat herritar, batzuk ezagunak, hala nola ezker abertzaleko kide Tasio Erkizia, Aralarko Josu Murgia, Alternatibako Jonathan Martinez, zein AEK-ko Edurne Brouard eta Lutxo Egia idazleak