Euskal Herrian Euskaraz Albisteak Lan mundua

Oiartzungo Euskal Herrian Euskaraz taldeak ez du etsi herriko bi merkatalgune nagusiei zuzenduriko kanpaina. Aspalditik ari dira Oiartzungo euskaltzaleak Alcampo eta Carrefour merkatalgune handietan urratzen diren hizkuntza eskubideen aurrean era guztietako dinamikak eta erantzunak artikulatzen, hala nola, sinadura bilketa erraldoi, ekimen erreibidinkatzaile, elkarretaratze eta halakoak baliatuz. 2008tik daramaten borrokaren aurrean aipatu merkatalguneen erantzun eza ikusita, Oiartzungo EHEk protesta egingo du ekainaren 25ean, plazan.

Aurreko albistean esaten genuen eta oraingoan ere berdina azpimarratu behar dugu. Izan ere, Jaurlaritza herri euskaldunaren kontra hartutako neurri berriak iragartzen ari da egunez egun. Batetik, 2008an onartutako Kontsumitzaileen eta Erabiltzaileen Hizkuntz Eskubideei Buruzko Dekretua aldatuko du, eta ez die inolako isunik jarriko dekretuan ezarritako irizpideak bi urtetan bete ez dituztenei. Kontseiluak gogor kritikatu du Jaurlaritzaren neurria. Bestalde, Hizkuntza Politikarako Sailburuordetzak esleitutako diru laguntzak milioi erdian murriztu ditu, iaz eta duela bi urteko esleipenetan luzatutako kopuruak urrituz. Arlo kaltetuenak Euskara Biziberritzeko Plan Nagusiari eta enpresa munduari zuzendutako Lan Hitz programari dagozkie. Argazkian, Oiartzungo EHEk Alcampo merkatalgunean egindako ekimena duzue